انا في مشكلة كبيرة!

السلام عليكم اختى الجميلة المريمية
انا سعيدة جدا بالقرار اللى انتى وصلتيله واللى ربنا وفقك ليه
وده ان حصل فهو علشان انتى قلبك جواه خير كبير فاختار ربنا على هوى النفس
سامحينى انا يمكن ما شاركتش فى المشكلة من اولها
لكن ما شاء الله كنت شايفة اهتمام كل اخواتنا بالموضوع ربنا يكرمهم ويبارك فيهم
لكن كنت متعمدة فى وقت معين انى ما اشاركش لان كنت عاوزة اتأكد من حاجة
واتأكدت الحمد لله وانتى اكدتيها بقرارك ده
ربنا يكرمك ويسعد قلبك ويرزقك ان شاء الله زوج صالح تقى نقى ينور ايامك
وانتى يا مريومة صغنونة خالص اكيد هتشوفى ناس كتير فى حياتك
وكمان هتكونى وقتها انضج واوعى فى انك تاخدى فعلا القرار الصح فى اختيارك ده

وجه بقى دور أختك فى الكلام

عاوزة الاول ابشرك ان " من ترك شيئا لله عوضه الله خيرا منه "
ومش هقولك بقى على تعويض ربنا بيكون ايه وبيكون ازاى

وعاوزة اقولك على حاجة يا مريومة مفيش حد بيموت من الحب
يعنى لو كنتى خايفة عليه زى ما كنتى بتقولى فى الاول ما تخافيش ولا حاجة
لانك ببساطة بتنفذى الصح ومستحيل الصح ده يكون ليه عواقب تئذيكى بعد كده
اللى بيشيل ربنا من حساباته بيعيش فى هم وضنك طول عمره
لكن انتى اخترتى ربنا وده اكبر دليل على قوتك انك تقدرى تقهرى صوت النفس والهوى اللى جواكى اللى بيقولك لا اوعى تسيبيه دلوقتى احسن يجراله حاجة
او يقولك طب بلاش ما تقطعيش بس قللى من الكلام بس
كل ده طبعا كلام الشيطان وهوى النفس الامارة بالسوء
وكمان هو لوكان فعلا الانسان والزوج الصالح اللى انتى بتتمنى تكملى معاه حياتك
يبقى المفروض يحب لك الخير ديما يعنى كان يشجعك فى قرارك اول اما قولتيله
فى البداية انكم تبعدوا لحد ما ربنا ييسر الامور ويكون هو قادر على الزواج
ويجيلك من الباب ويطلبك من اهلك قدام كل الناس وتكونى فخورة بيه
لكن هو معملش كده بالعكس ده هو اللى كان بيرجعك فى كل مرة تقررى فيها انكم تبعدوا لان كلامكم والعلاقة الموجودة ده شىء يغضب ربنا ويبعدكم عنه
يمكن اكون مقدره فعلا انه قرار مش سهل ابدا
لكن لما الانسان بيتحط فى موقف بيكون فيه اختيار بين شىء حبيب الى نفسه وبين ربنا انا شايفة ان القرار بيكون اسهل واوضح ولازم كفة الحق هى اللى ترجح فى النهايه
وما دام انتى اخترتى ربنا يبقى كده انتى وصلتى لشاطىء الامان
ربنا اسمه الوكيل ما دمتى اخدتى بكل الاسباب يبقى توكلى عليه وارمى كل شىء تانى ورا ظهرك
( ءالله أمرك بهذا إذاً لن يضيعك )
انتى اكيد مؤمنة ان الزواج رزق من عند الله عز وجل
ايه يجبرك تدخلى نفسك فى الحوارات دى كلها والمتاهات دى وانتى واثقة ان ده لوكان نصيبك
ربنا هيجيبهولك لحد عندك من غير ما تتعبى نفسك ولا تدخلى فى علاقة من هذا النوع
كمان أهلك اللى أكيد واثقين فيكى ليه ترضى ليهم كده وكأنك استغليتى الثقة دى بشكل غلط
اكيد انتى حسيتى انك بعدتى عن ربنا فى الفترة دى وبقيتى مقصرة فى طاعته وكل ده بسبب
العريس المجهول
افرضى اتقدم مثلا وأهلك رفضوه لأى سبب يبقى ساعتها انتى علقتى قلبك على الفاضى
بشخص مش هو نصيبك خدى بالك يا جميلة ان زوجك اللى مكتوبلك عند ربنا واللى انتى لسه مش عرفاه
ليه حقوق عليكى من دلوقتى من قبل ما تعرفيه
وفرى ليه اى كلمة حلوة ممكن تقوليها فى الحرام وفرى ليه كل احساس جميل تحسيه ناحيته
وفرى مشاعرك ليه وكل الحب اللى جواكى البنت المتدينة اكتر بنت تجيد فن الحب مع زوجها
لانها كانت محافظة على نفسها وعلى قلبها ليه هو وبس لحد ما يظهر لها .



والحمد لله انتى اخدتى قرارك الصح فى الوقت الصح
اما عن انك تخبرى اهلك عن طبيعة العلاقه دى كانت ازاى
فرأيى ان ما دام مفيش حد بيسألك عن حاجة بعينها ما تحكيش اى حاجة
لان كل كلمة هتقوليها هتتسجل وثقتهم هتقل مع الوقت مع ان دلوقتى انتى خلاص بتعملى الصح والحمد لله عشان كده بلاش تحكى على حاجة افضل ليكى وله